ලාංකේය මාධ්‍යය භාවිතය නොහොත් තෙල ගැසීම

Click here to get Sinhala Unicode.

ජනමාධ්‍යය සහ මාධ්‍යය නිදහස වත්මන් සමාජයේ ප්‍රධාන මාතෘකාවක් වී හමාරය. අද රටේ පිරිහෙමින් පවතින්නේ මාධ්‍යය නිදහස පමණක්ද? නැත. අද අප රටේ මාධ්‍යය සංස්කෘතියද එන්න එන්නම අගාධයට යන ශෝකජනක වාතාවරණයක් උද්ගත වී තිබේ. අද මාධ්‍යය දේශපාලනීකරණය වී ඇත. සෑම මාධ්‍යය නාලිකාවක්ම කුමන හෝ යටි අරමුණක් පෙරදැරිව ක්‍රියාත්මක වෙයි. එය වරෙක තම නාලිකාවේ ප්‍රසිද්ධිය උදෙසාද වරෙක දේශපාලනික කඩේ යෑමක් වශයෙන්ද ක්‍රියාවට නැගෙන අපූරුව මැදහත් සිතින් බලන සියල්ලන්ටම පෙනී යනු නොඅනුමානය. විශේෂයෙන්ම තම නාලිකාවේ ප්‍රසිද්ධිය උදෙසා ඕනෑම දෙයක් කිරීමට බොහෝ මාධ්‍යය චැනල සූදානම්ය. සාවද්‍ය තොරතුරු ප්‍රකාශය කිරීම මේ අතර ප්‍රමුඛත්වය ගනී.

මෙහි ප්‍රතිඵලය මාධ්‍යය කියන ඕනෑම දෙයක් එලෙසම පිලිගන්නා දැනුමක් තේරුමක් නැති අමනයන් පිරිසක් රටේ බිහිවීමයි. අද රටේ තරුණයින්ටත් ළමා පරපුරටත් යුද්ධය යනු සතුටට කාරණාවක් යැයි යන වැරැදි මතය සමාජගත කර තිබේ. පහුගිය දිනවල උතුරේ යුද්ධයට අමතරව මාධ්‍යය යුද්ධයක් පැවැතුණි. ඒ වෙන එකකට නොව රටේ ජන්ප්‍රියම ප්‍රවෘත්ති ප්‍රකාශකයා වීමටය. යුද්ධය ගැන විනාඩි 15-20 මොනවා හරි කියවා ජනතා ආකර්ෂණය දිනීම ඔවුන්ගේ අරමුණ විය. අද යුද පුවත් නොමැතිව ප්‍රවෘත්ති විකාශයන් වල් වැදෙමින් පවතී. යුද ක්‍රියාන්විතය පුරාවටම විශේෂයෙන්ම රජයේ මාධ්‍යය ප්‍රමුඛ තවත් චැනල සහ පුවත්පත් රාශියක් එක්සත් ජාතික පක්ෂය සහ එහි නායකත්වය නිර්දය ලෙස විවේචනය කළේ කොටි ලේබල් අලවමිනි. අද තරුණ පෙලත් ළමා පෙලත් තුල එක්සත් ජාතික පක්ෂය සහ එහි නායකත්වය ගැන ඇත්තේ එලෙස මාධ්‍යය විසින් කෘතීමව මැවූ ප්‍රතිරූපයයි. අද ජනතාවට ප්‍රතිපත්තියක්, මතවාදයක් නොමැත. ඔවුන් ඉබාගතේ යති. ආර්ථිකය ගැනවත් සමාජ සංවර්ධනය ගැනවත් ඔවුනට අදහසක් නැත. බොහෝ දෙනා පසුගිය පළාත් සභා මැතිවරණවලදී එක්සත් ජනතා නිදහස් සන්ධානයට ඡන්දය දුන්නෙ ප්‍රතිපත්ති පිළිබඳව අදහසක් ඇතිව ඊට පක්ෂවද? එක්සත් ජාතික පක්ෂ ප්‍රතිපත්ති ගැන අදහසක් ඇතිව ඊට විරුද්ධවද?

මොරටු විශ්වවිද්‍යාලීය ඉංජිනේරු පීඨයේ මාගේ සහෘදයකු පසුගිය පළාත් සභා මැතිවරණයේදී සන්ධානයට ඡන්දය දුන්නේ එහි ප්‍රතිපත්ති ගැන කිසිඳු අවබෝධයක් නැතිවය. ඔහුගෙන් සන්ධානයට ඡන්දය දීමට හේතුව විමසූ විට කීවේ “යුද්ධය දිනන්න මහින්දගෙ මොරාල් අප් කරන්න දුන්නු බවයි”. පළාත් සභා, පළාත් පාලන ආයතන පවතින්නේ කාගේවත් “මොරාල් අප්” කරන්නට, පක්ෂයේ ලොක්කන් විකුනාගෙන පොඩ්ඩන්ට ඡන්ද දිනන්නට නොව ග්‍රාමීය සහ පළාත්බද සංවර්ධනය ඉහල නැංවීමට බව අධ්‍යාපනයක් ඇත්තවුන් පවා තේරුම් නොගැනීම දුක්බරය. ඉහත කී මිත්‍රයා මනාප සලකුණු කර ඇත්තේ ඡන්ද පලට යන අතරමගදී දුටු පෝස්ටර නරඹාය. තමා මනාපය දුන් අපේක්ෂකයන්ගේ නම්වත් හරියට හේ නොදනී. රටට අත්වන දුක්බර ඉරණම මෙයින් පිළිබිඹු නොවන්නේද? අද ඉගෙනීමෙන් පරතරයට යන්නන්ටවත් රට ගැන සැබෑ දැක්මක්, කැක්කුමක් නැති ගානය.

අද වන විට රටේ ජනතාව මාධ්‍යය කියන ඕනෑම දෙයක් පිළිගනිති. ඒවායේ ඇත්ත නැත්ත ගැන ජනතාව නොසොයති. ඔවුනට ඒ ඒ දේශපාලන පක්ෂයේ මතවාදය ගැන වැඩි අවබෝධයක් නැත. ඔවුනට ප්‍රතිපත්තිමය කරුණු කාරණා ගැන හොඳ අවබෝධයක් නොමැත. මෙය බොහෝ දුක්ඛදායක තත්ත්වයකි. විශේෂයෙන්ම මනාප ක්‍රමය භාවිතයේදී ජනතාව රට හා ප්‍රතිපත්ති පසෙකලා නුසුදුස්සන්ට මනාපය පළ කිරීම සෝචනීය මෙන්ම දේශද්‍රෝහී ක්‍රියාවකි. ජනප්‍රියත්වය, ධනය, බලය යනාදියට තම රටේ මතු අනාගතය සහ ප්‍රතිපත්තීන් පාවා දීමට තරම් අද ඇතැම් ශ්‍රී ලාංකිකයෝ අමන වී හමාරය. නමුත් මෙම ක්‍රියාවලියේ පාඩුව එක්සත් ජනතා නිදහස් සන්ධානයටයි. මේ වන විට එක්සත් ජාතික පක්ෂයට ඡන්දය දෙන්නෙ එම පක්ෂ ප්‍රතිපත්ති පිළිබඳව මනා අවබෝධයක් ඇත්තෙකි. එයින් කියැවෙන්නේ එක්සත් ජාතික පක්ෂ ඡන්ද ගොඩ සන්ධානකාරයෝ සිහින දකින අන්දමට එන්න එන්න අඩු නොවන බවය. ලංකාවේ විශාලතම දේශපාලන පක්ෂය ප්‍රතිපත්තිමය හේතු කාරණා මත එසේ තම ඡන්ද පදනම තබා ගනිද්දී ශ්‍රීලනිපයට ඇති ඔවුන්වත් නොදකින යථාර්ථය කුමක්ද? සරලයි. මේ වකවානුවේ යුද ජයග්‍රහණයෙන් සහ මාධ්‍යයෙන් මුසපත් වී සන්ධානයට ඡන්දය දෙන්නවුන් යම් හෙයකින් හෙට රටේ තත්ත්වය අනෙක් පැත්ත හැරී ආණ්ඩු විරෝදී රැල්ලක් ගොඩ නැගුනොත් ආණ්ඩුවට පිටු පානු නොඅනුමානය. අද අප සමාජය තුල බිහි වන්නේ අවංකව රටට ආදරය කරන ජනතාවකට වඩා රැල්ලට ගහගෙන යන බාහිර බලපෑම් වලට තම අදහස් උදහස් පාවා දෙන අවස්ථාවාදී පරපුරක් වීම ඊට හේතුවයි.

එනිසා රටේ ඇතිවිය යුත්තේ ජාත්‍යාලය අවුස්සන සමිප්‍රදායයක් නොව රට ගැන සැබෑ ආදරයක් ගොඩ නැගෙන අවබෝධාත්මක ප්‍රතිපත්තීමය දේශපාලනයකට ඉඩ හසර විවර කර දෙන ආකල්ප වලින් සන්නද්ධ වූ යුගයකි. රටේ අනාගතය ගැන සංවේදී නිද්‍රාශීලී නොවන බුද්ධිමතුන්ගේ යුගයකි.

පසුගිය කාලය පුරා රටේ මාධ්‍ය අයිතීන් සහ මානව හිමිකම් වෙනුවෙන් පෙනී සිටි උදවිය කොටි හිතවාදීන්, දේශද්‍රෝහීන් ලෙස ඇතැමුන් සිදු කරනු ලැබූ හංවඩු ගැසීම ලාංකේය ජන සමාජය වෙලාගෙන ඇත. අද ජිනීවා මානව හිමිකම් කමිටුවේ ලංකාවට එරෙහිව ප්‍රකාශ නිකුත් කරන සුනන්ද දේශප්‍රිය මෙන්ම එදා ප්‍රේමදාස පාලන සමයේදී ජිනීව මානව හිමිකම් කමිටුවේදී මහින්ද රාජපක්ෂයන්ද ශ්‍රී ලංකාද්වීපයට එරෙහිව කරුණු ගොනු කළ බව බොහෝ දෙනෙක් නොදනිති. එසේ එතැනින් නොනැවතුණු මහින්ද සංවර්ධිත රටවලට කොන්දේසි සහිතව මිස ලංකාණ්ඩුවට ආධාර නොදෙන ලෙස බලපෑම් කළේය. මෙය දේශමාමකත්වයද? දේශමාමකත්වය තීරණය වනුයේ ක්‍රියාවෙන් සහ අරමුණින් මිස පුද්ගලිකත්වයෙන් නොවන බව මහා ලොකු දේශප්‍රේමීන් ලෙස තමන් තමන්ටම ලේබල් අලව ගන්නා පණ්ඩිතයින් තේරුම් ගත යුතුය. විටෙක රටට ද්‍රෝහි වන්නකු විටෙක රටට මහත් සුගතියක් අත් කරලිය හැක. විටෙක රටට සුගතියක් ගෙනෙන්නෙකු තවත් විටෙක රටට විනාසයක් අත් කරලිය හැකිය.එදා මහින්දව දේශද්‍රෝහියකු ලෙස කොන් කර පහර දුන්නේ නම්, මරා දැම්මේ නම් අද රට කුමන දිශානතියක පවතිණු ඇත්ද?

එනිසා ලාංකේය ජන සමාජය තමන් හිසට අනෙකුන් පැටවූ පටු දේශපාලනික මතවාදයන්ගෙන් බැහැරව පුළුල් දෘෂ්ඨිකෝණයකින් රට දෙසත් දේශපාලනය දෙසත් බැලීම කාලීන අවශ්‍යතාවයකි. විවිධ දේශපාලන පක්ෂ සහ පුද්ගල චරිත කෙරේ ඇති සත්‍යය කරුණු විමසා බලා මිස නිගමන වලට එලඹිය නොයුතුය. බාහිර බලපෑම්වලට නතු නොවී බුද්ධියෙන් විමසා තමුන්ගේම මතවාදයක් ශ්‍රී ලාංකේය අප සැම ගොඩ නගා ගත යුතුය. රටක් හැටියට අපගේ ප්‍රගමනයට එය රුකුලක් වනු නිසැකය.

හෙට්ටිගේ ඇන්. පෙරේරා, 2009 පොසොන්

H Niles Perera©, June 2009

Advertisements

One response to this post.

  1. Posted by saku on ජූනි 20, 2009 at 14:55

    මාධ්‍යයේ වගකීම වනුයේ ඇත්ත ඇති සැටියෙන් වාර්තා කිරීමය. නමුත් නානාප්‍රකාර දේශපාලන පක්ෂ වලට කත් අදිනා වත්මන් මාධ්‍ය ආයතන සත්‍ය යන නිරුවතට නානාප්‍රකාර විලසිතා කොට ජනතාව මුලාවේ දමන සෙයක් දිස්වේ. මෙබඳු මාධ්‍ය ආයතන වල උණුසුම් පුවත් ක්ෂනික නූඩ්ල්ස් පැකට් සේ ගිල දමන තරුණ පරපුරද පිරිහී යන්නේ තර්කානුකූලව සිතීමේ හැකියාව ක්‍රමයෙන් මොට වන බැවිනි. මෙවන් යුගයක බහුතර ජනතාව මාධ්‍ය ආයතන පාලනය කරන කූට මිනිසුන්ගේ ඉත්තන් වීම ඉතා ශෝකජනක කරුණකි.

    ප්‍රති-පිළිතුරු සැපයීම

ප්‍රතිචාරයක් ලබාදෙන්න

Fill in your details below or click an icon to log in:

WordPress.com Logo

ඔබ අදහස් දක්වන්නේ ඔබේ WordPress.com ගිණුම හරහා ය. පිට වන්න / වෙනස් කරන්න )

Twitter picture

ඔබ අදහස් දක්වන්නේ ඔබේ Twitter ගිණුම හරහා ය. පිට වන්න / වෙනස් කරන්න )

Facebook photo

ඔබ අදහස් දක්වන්නේ ඔබේ Facebook ගිණුම හරහා ය. පිට වන්න / වෙනස් කරන්න )

Google+ photo

ඔබ අදහස් දක්වන්නේ ඔබේ Google+ ගිණුම හරහා ය. පිට වන්න / වෙනස් කරන්න )

%d bloggers like this: